5.831 feður í fæðingarorlofi árið 2014 - sjá yfirlit yfir þróun

5.831 feður í fæðingarorlofi árið 2014 - sjá yfirlit yfir þróun

Árið 2014 voru 5.831 feður í fæðingarorlofi, í samanburði við 6.824 mæður. Þetta kemur fram í svari Fæðingarorlofssjóðs við fyrirspurn lesanda, en þar segir jafnframt að feður taki almennt fæðingarorlof síðar en mæður. Þetta þarf síðan að hafa í huga, þegar þróun síðustu ára er skoðuð, því þá taka tölur mið af fæðingarári barna. Í yfirlitstöflu sem Leó Örn Þorleifsson forstöðumaður Fæðingarorlofssjóðs tók saman, má sjá að mesta breytingin á fæðingarorlofi feðra hefur verið ef fjöldi orlofsdaga feðra er borin saman við árin eftir aldamót. Þannig var meðaltalsfjöldi feðra í orlofi aðeins 39 dagar árið 2001, til samanburðar við 73 daga árið 2014. Mæður taka þó enn mun fleiri fæðingarorlofsdaga en feður, en meðaltalsfjöldi mæðra í orlofi árið 2014 voru 179 dagar.

Lesandi spyr:

Hvað tóku margir karlmenn fæðingarorlof árið 2014 í samanburði við fjölda kvenna?   

Spyr.is bætti við ofangreinda fyrirspurn og óskaði eftir nánari sundurliðun, s.s. á dagafjölda og þróun. Fyrir hönd Fæðingarorlofssjóðs, svaraði Leó Örn Þorleifsson, forstöðumaður.

Leó:

Greiðsluárið 2014 tóku 5831 feður fæðingarorlof/styrk á móti 6824 mæðrum. Þegar nýting kynjanna á fæðingarorlofinu er skoðuð verður hins vegar að skoða tölur út frá fæðingarári barna en ekki greiðsluári.

Ástæðan er sú að hægt er að taka fæðingarorlofið á löngum tíma.

Þannig var hægt að taka fæðingarorlof með börnum sem fæddust, voru ættleidd eða tekin í varanlegt fóstur á árunum 2012-2013 á 36 mánuðum en vegna barna sem fæddust, voru ættleidd eða tekin í varanlegt fóstur árið 2014 á 24 mánuðum. 

Taflan sýnir endanlegar tölur fyrir árin 2001 – 2011 en bráðabirgðatölur fyrir árin 2012 – 2014 miðað við febrúarlok 2015.

Mikilvægt er að hafa í huga að reynslan hefur sýnt að almennt taka feður fæðingarorlof þegar lengri tími er liðinn frá fæðingu barna þeirra en mæður og því líklegt að hlutföllin vegna áranna 2012 – 2014 eigi eftir að breytast nokkuð. Endanlegar tölur vegna barna sem eru fædd, ættleidd eða tekin í varanlegt fóstur 2012 – 2013 liggja ekki fyrir fyrr en um áramótin 2015/2016 og áramótin 2016/2017 vegna barna sem eru fædd, ættleidd eða tekin í varanlegt fóstur árið 2014.